【吃】台北。合掌村(華山市場)

壽司一定要喺大商場或高級食店先有？！

非也！台灣人好多時會喺乜乜市場內開設壽司店，有立食又有坐低食。
佢哋嘅市場有d似香港嘅熟食中心mix室內街市，唔好以為店舖細細就會無啖好食，但其實分分鐘可以有驚喜。

喺華山市場內嘅合掌村最近成為人氣高企嘅日式料理店，好多人為求食到好嘢而早早排隊。

當然我都唔例外啦，開店前半個鐘已到，真係神心過返工

輪椅朋友想去絕對冇問題呀！因華山市場設有斜道，不過真係超級斜...

坐電動輪椅 嘅我雖然不費功夫就轆上斜路，但仍然需要朋友企後陪住，走嘅時候更要向後落...

手推輪椅嘅朋友自量力而為喇

食店排隊位置喺市場外，有牌棟起好易見到，不過有樓梯，同店員講聲好等佢哋安排啦。

另外，店內有吧台一張，客人可以近距離睇到師傅準備食物嘅整個過程，當然間中仲可以互相傾計。

係幾正嘅，但位置唔多，所以店員會多擺幾張一般枱櫈招待客人...

所以輪椅使用者唔需要擔心吧台過高而食得辛苦。

。

。

落單喇喂:

味噌湯(免費): 睇相都知勁足料，好鮮甜，仲要無限添飲。冬天一手捧住熱湯一碗，真係暖在心。

明太子玉子燒 NTD 40 (單點): 

味道好食嘅，但無諗過舊玉子燒係凍食，假如熱食會更吸引。

干貝海膽 NTD 160(單點): 

干貝亦即係帶子，size好大隻，微微燒過。海膽唔係creamy口感果款，有少少咬口，味道OK啦。

炙燒比目魚 NTD 70(單點):

醬汁稍為濃咗少少

頂級十二貫 NTD 490(握壽司): 

嘩！哈...presentation真係好靚嘅！每款壽司配上唔同嘅汁料，味道幾特別

合掌村海鮮丼 NTD 390(丼飯):

根據當日新鮮嘅食材而製成，魚生好新鮮又大塊...

最鍾意就係三文魚籽，鮮甜到不得了。

壽司飯嘅份量都好多，唯一不足就係味道較甜。生蠔無腥味

明太子稻禾:

只要like 合掌村Facebook就會免費送

食店資料:

台北市中正區忠孝東路一段108號華山市場1樓

營業時間：星期二至六 11:30AM - 2PM、5PM - 7:30PM 星期日 11AM - 1:45PM (星期一公休)

交通：捷運善導寺站BL13 5號出口即到