【2018台中遊記】 Day2: 台中市第二市場、彩虹眷村、筏子溪、旱溪夜市】part 1

【2018台中遊記：台中市第二市場、彩虹眷村、筏子溪、旱溪夜市】part 1

今日勁呀！瞓醒一出酒店已經感受到果一股熱浪～早餐仲要去一d無冷氣嘅地方食！

呢幾次去台灣...口味變咗...成日想食比較道地嘅嘢...

今朝特意去「台中市第二市場」搵食...無乜遊客，以local人為主...正合心意！

先去「王記菜頭棵糯米腸」見好多台灣人排隊都應該唔太差...

乜都唔諗就直接叫菜頭棵+糯米腸...呀！又幾好食喎！台中人無論食乜都鍾意加甜甜哋嘅辣醬...
而菜頭棵即係蘿蔔糕，先蒸然後表面輕輕煎過...而且係無餡料嘅～鍾意食糯米都唔會抗拒糯米腸㗎喇...
同樣係無餡，但又唔會覺得太單調而唔想食，一份share唔夠飽…

再去附近嘅「顏記」食個包+小雲吞...

買多杯凍飲...

就起程去「彩虹眷村」喇！

其實「台中第二市場」有公車30可以搭，可惜走車
http://user.frdm.info/ckhung/saas/bus/taichung/timing4.php?rid=30&timeformat=1&refresh=0
於是行去附近嘅「臺中醫院」改搭公車27
http://user.frdm.info/ckhung/saas/bus/taichung/timing4.php?rid=27&timeformat=1&refresh=0
2架公車同樣喺「嶺東科技大學(嶺東路)」落車...

map話由落車點行去「彩虹眷村」要5分鐘...

但人生路不熟或多或少會迷路...假如係某一個方位見到大大個「一福堂」廣告版嘅話，向住塊板行，好快就會到「彩虹眷村」...

**當日只見過一塊「一福堂」廣告版...之後有可能會轉其他廣告...唔～大家都係睇map或問人好d XD 

到喇到喇...終於到「彩虹眷村」

同時亦熱到跳舞！

太陽係super強勁！一定一定一定要搽防曬！！

最重要就係去買西瓜汁飲

夠凍、大杯、杯身都靚嘅！

涼爽咗一陣就開始拎哂所有手機、自拍神棍、相機、腳架...

但影唔夠一粒鐘就覺得成個人暈暈哋又浮浮哋...
又突然覺得好肚餓...最奇怪就係越嚟越想瞓覺...好攰好攰...@@

應～該～係～中～暑～
唔知...未試過...無經驗...

朋友立即送走我...

再去到最近嘅全家買一包冰、凍飲一支、飯團一個...最初真係連飯團都無力咬...
要靠支凍茶沖落喉嚨先吞到...體力終於回復喇！而且唔敢離開7仔，唔想離開冷氣(雖然冷氣唔涼)...
一直hea到4點幾，太陽無咁猛先敢再出去...
於是又再重返「彩虹眷村」～

今次可以慢慢睇慢慢影，人又少咗一大半...
旅行團都走哂～正！

「彩虹眷村」係靚嘅又夠繽紛，齋睇好開心！呢度所有畫係由一位伯伯一手一腳畫，最估唔到，原來伯伯係香港人！！
大家可以用廣東話同佢傾吓計...我無呀...疑似中暑呀嘛...再折返「彩虹眷村」伯伯都返咗屋企lu～

最後買咗一把自動傘以作支持就走人喇～