先長氣後睇遊記

去旅行對於一般人嚟講真係較容易...只要機票價錢合心水、有足夠假期、盤川帶夠...
就算一支公無人陪都可以輕易出門幾日...
但對於輪椅使用者嚟講...去旅行絕對唔係講咁易。

1.首先要有一份工作有收入（輪椅人士唔易搵工㗎）儲定好金錢彈藥嚟支付旅途上嘅洗費...
假如有家人/朋友人請你去旅行，恭喜你！你好幸福呢！

2.就算有足夠金錢去一次（當然希望有更多下一次啦！）旅行...相信輪椅使用者更擔心整個旅行是否有人可以照顧自己...唔需要別人額外照顧/幫忙嘅你...又要恭喜你！因為你有更多嘅自主權及自由度。
相反，輪椅使用者往往會需要身體上嘅照顧。假如家人有能力有財力一齊去旅行就當然好啦。否則就要依靠義工（唔肯定有無）或朋友。如果你遇上呢類朋友，你真係好好運！
不竟人哋亦有自己嘅假期、金錢、時間嘅計劃，你係完全無得強求他人！
再加上，一對一 24小時嘅照顧一定比返工更費心費力...
所以嘛，要知足及感激...旅途上咪咁嫌三嫌四！

3.由出發到回程，過程中輪椅使用者一定需要其他人（家人、朋友、職員、空姐.....etc）嘅照顧及配合先可以令旅行嘅過程順暢...
所以，好多時去旅行要影相都只會用手機...貪佢夠輕夠方便攜帶...你會發現d相完全無技術可言...
因為旅途上嘅相只為「記憶」而影...

4. 種種原因...輪椅使用者經常需要較多時間去抵達下一景點（明明已預鬆時間）...
所以影相嘅空間亦未必夠...假如遊記中某d景點、進展過程無相睇...就真係無辦法，無理由叫全村人等你一個慢慢影....
所以我會盡量搵其他人嘅遊記做補充...有時亦會唔想影相...因為親身體驗旅行先係重點...

5.寫遊記嘅目的係想比自己回味一下旅行時嘅點點滴滴...同時亦本著開心share嘅方向比一d想去旅行但又未能起動嘅輪椅使用者作參考...
好多時事情能否達成都只不過係時間上嘅磨合...當時機一到就可以出發！