轆想說。巴士實時顯示空櫈之輪椅位呢?

其實我經常搭巴士...不論轆出街玩定係返工放工...
如果時間地點配合對嘅話都會選擇坐巴士…純粹個人喜好啦～

睇完呢單新聞....

(HK01 官網圖片)

隨即recall好多與巴士有關嘅記憶出嚟…唔知當中有幾多樣會係大多輪椅使用者亦都經歷過呢？

🚌 好記得以前準備出門口之際總會先打去 九巴熱線，查詢即將開出嘅巴士是否金巴。

原來「金巴」呢個術語大多九巴職員先會明，若要打去新巴/城巴CS就要講「低地台巴士」

最初都有d反白眼…但呢個情況其實都會發生喺一般人身上…例如身邊嘅朋友咁啦…

相信只有輪椅人士先會一講即明吧～

🚌 任何類型嘅customer service電話都係難打入嘅，等待職員接通對話嘅時間更加係耐性嘅考驗。

所以不論係九巴、新巴/城巴 hotline 語音選擇嘅數字代表亦一一記得，務求用最短時間就駁到電話receptionist。

有時最激氣就係等等吓無啦啦自動斷線！真係會嬲到火燒心㗎！！好彩電話有重撥號碼功能

🚌 最誇張嘅係，自己phone book裡面有埋巴士站頭電話號碼，直接問站長，完全skip咗打去hotline問呢一part！

快好多㗎，同時亦體驗到好多真性情嘅打工仔...有d勁好禮貌，但有d又好鬼燥底又急進...總之一般CS係唔會經歷到～

🚌 後來九巴app推出巴士抵站時間顯示，最抵讚可以show埋未來三段班次巴士係咪可以上輪椅！嘩！真心覺得好有用！

一來唔需要再打去CS左問右問等到天荒地老，二來交通上多咗彈性，選擇亦會更隨意～

🚌 今次嚟到紅外線感應器實時顯示車廂內座位數目狀況，堅真希望可以將輪椅位納入在內，繼而喺app中show出嚟。因為有d目的地可以由多條巴士路線抵達，就算當刻已抵站嘅巴士有輪椅乘客上咗車，正在排隊等上車嘅輪椅使用者都可以轉陣去排 & 搭第二或第三架巴士，諗吓都覺得好方便！

🚌 但相信呢個技術仍有好多需要注意嘅地方，例如點樣可以更準確顯示輪椅位已被使用中？究竟係有人企喺輪椅位呀？定還是有行李呢？一於拭目以待啦