2022西雅圖：Amtrak火車 (溫哥華 ➜ 西雅圖) 真 · 去程

上篇講到miss咗巴士，所以去程就買咗單程火車飛。最終...

成功上到火車!! 講真，身心都好攰～

火車勁高身，離遠已有手動升降台等緊我。

入到車廂已有劃位比輪椅，空間唔錯嘅，完全夠位比我自轉360。

座位隔離有洗手間，又有無障礙廁所，相比之下的確比一般人用嘅大又闊。

但實質比輪椅人士用嘅，仍然係又細又窄又逼，完全唔夠位轉彎/泊位

不過叫做有廁所可以用，改善嘅空間依然存在。

又講吓一啲零星嘅嘢呀...

肚餓嘅話，車上有賣嘢食嘅，都係一般嘅pizza熱狗汽水...一堆無乜衝動想食嘅肥仔嘢...

火車有提供free wifi嘅，但要開車後一個鐘左右先有，大概過咗Surrey後。

又唔知過咗幾耐就有announcement話有海關去check大家嘅passport & 報關表

因為兩手fing fing入美國，所以填表都無乜難度。記住最底要簽你個大名，加寫日期，格式係月/日/年。

成個過程勁短，15分鐘內就散band，無問任何問題或檢查背囊之類...

5:45pm開車，大概10:00pm左右到就到西雅圖King Street Station.

上網睇話坐火車，車程會短啲，但可能今次大雪關係，無特別早呀。