復康巴士之週末旅遊線。大澳 part 1

一直想去大澳好耐好耐...

不過交通配套方面...對於輪椅使用者嚟講係一d都唔方便...
早前得知「香港復康會」搞咗一個「週未旅遊線計劃」

(官方圖片)
大澳竟然係景點提供之一！當然立即動身book車啦...
出發前天色陰陰沉沉...點知天氣越變越放晴！
仲有d熱！
~~~~~~~~~~~
由於上車地點近地鐡站...

所以喺「東涌站」落車去A出口再往的士站... 

離遠已見到復康巴....自從有咗$2乘車優惠之後...已經好少搭復康巴lu...
輪椅扣好安全帶後，司機會向各人收取車費，用八逹通拍一拍就可以了。好方便呢！
出發去大澳喇....
車程大概一粒鐘...不設中途站...

到逹喇！落車位置就係巴士總站傍邊...
一於先漫遊海濱長廊...

其實天陰亦有好處...起碼唔會太熱...

呢條橋好長架，而且全程都係露天的！可能面向山啦，四周又空曠...不斷有風吹埋嚟，十分十分舒服！

路面平坦...轆得自在...

兩面嘅風景又靚... 

綠色真係好療癒~~

途中影吓相、睇吓風景、同朋友嘻嘻哈哈都用咗大半個鐘...

係時候食午餐…朋友多年前食過「海韻素食菜館」話味道唔錯…所以就選定食呢間喇...

見到已甩色嘅路牌就左轉...

全程直路就會搵到...

去到門口先知有一級…當刻都唔知點好…

好在朋友當中有坐手推輪椅而且佢又可以落地行幾步…

於是我就轉坐佢部車…齊齊有飯食(yeah！)

雖然食店舖寫住「素食」…但其實無關係…

事前無預約，等咗一陣竟然有枱！

呢度主打食中菜…大家鍾意食乜就叫乜～

椒鹽鮮魷 $70

新鮮即炸，好食！

鹽焗雞半隻$145

新鮮雞味道真係唔同d！調味剛剛好，又係好食。

咕嚕魚塊$70
味道一般

蝦醬通菜$60
入到嚟大澳自然想食蝦醬，正呀！

荔芋酥卷 $70
又係即炸，超級熱！好食呀，芋頭好粉糯，一d都唔油膩~

生炒牛肉飯 $50

味道麻麻哋，又唔夠乾身，不過好大碟囉～

呢間食店應該有d出名...見到好多人都會嚟食...

味道又唔算勁好食...不過價錢唔算好貴....一般人嚟食吓又無妨

但對於輪椅使用者嚟講就唔太適合嚟喇...因為門前又有一級...

店內空間有少少逼...唔~自己衡量啦

待續...

食店資料︰

海韻素食菜館 (大澳)

大澳南涌村13B